श्री माधव प्रसाद रेग्मी

माधव प्रसाद रेग्मी नेपालको लोक सेवा आयोगका अध्यक्ष हुन्। उनी झापा जिल्लाको गौरादह–३ का स्थायी बासिन्दा हुन् तथा काठमाडौंमा बसोबास गर्दै आएका छन्। सरकारी सेवामा प्रवेश २०३७ साल वैशाख ९ गते अस्थायी डिठ्ठाको रूपमा गरेका उनी सोही वर्ष स्थायी खरिदार बनेका थिए। विभिन्न पदहरूमा क्रमिक रूपमा सेवा गर्दै उनी २०६८ साल साउन ११ गते सचिव पदमा पुगेका थिए। सचिवको रूपमा पूर्ण पाँच वर्षे कार्यकाल पूरा गरेपछि ५४ वर्षको उमेरमा लोक सेवा आयोगबाटै अवकाश प्राप्त गरेका थिए। लोक सेवा आयोगमा शाखा अधिकृतदेखि सचिवसम्म गरी करिब आठ वर्षको अनुभव सँगालेका उनी २०७८ वैशाखमा संवैधानिक परिषद्को सिफारिसमा लोक सेवा आयोगको अध्यक्ष पदमा नियुक्त भएका हुन्। यो नियुक्ति राष्ट्रपतिबाट औपचारिक रूपमा भएको थियो।